KRALENDIJK – Mas o ménos un 300 hende a sinta kome na Kaya Cornelis D. Crestiaan, un área bunita drecha, pa akomodá un kantidat di hende. 

Promé biaha mira asina hopi hende sinta dilanti i banda di otro pa kome, miéntras diferente grupo di músiko tabata entretené nan ku músika krioyo. Sigur un bon idea i por a skucha aki aya e hendenan komentá ku e aktividat tabata bon i por hasi esaki mas biaha durante aña. 

Esnan ku a kome e anochi, tabatin diferente eskoho, esta 5 diferente kos. Meskos e parti di bibida tabata hopi amplio, ku diferente bar. Algu úniko e hendenan a gosa di e anochi, tambe saka potrèt huntu ku famia òf nan deseo. 

Éksito

Posada Para Mira, ku ta e organisando di e aktividat, por mira bek riba un tremendo éksito. Esaki ta inisiativanan grandi, pensa i ehekutá, traha duru pe ta eksitoso. Potrèt un parti di e anochi den e kaya na Rincon.      

Polis ta bai usa kámara di vigilansia durante Dia di Rincon

Si no tin motibu partikular pa warda nan mas largu, lo destruí e imáhenan despues di 4 siman. Pòtret: KPCN

KRALENDIJK- Riba djamars, 30 di aprel 2024, Kuerpo Polisial Hulanda Karibense lo hasi uso di vigilansia di kamara durante aktividatnan na okashon di Dia di Rincon. 

E vigilansia di kámara temporal aki lo ta parti di un proyekto piloto di KPCN na kua lo investigá si instalashon di kamara móbil pa vigilansia tin balor agregá na eventonan kaminda ta spera un públiko grandi.

Ta instalá e vigilansia di kamara durante e eventonan pa mantenshon di orden públiko, pa un planifikashon di kapasidat polisial efektivo i pa e seguridat di públiko. Lo bai tin kámera na 15 sitio na Ricon. 

Imáhennan

Según bosero di KPCN a splika, lo prosesá e imáhennan di kamara si tin mester di un bon ehekushon di tareanan polisial diario (Artíkulo 8 Wpg). Lo destruí e imáhennan grabá despues di máksimo kuater siman. 

Si den kaso ku tin motibu konkreto dentro di kuater siman ku ta suponé ku e imáhennan di kámara ta nesesario pa investigashon di un echo kastigabel, e ora ei por sigui hasi uso di e imáhennan pa e meta aki. E términonan pa sigui hasi uso di esaki ta bálido e ora ei.