KRALENDIJK – Djarason atardi a surgi un fila largu na Aeropuerto Internashonal Flamingo na Boneiru. Tabata hopi drùk na e ‘slagboom’ ku ta duna akseso na e lugá di parker di e aeropuerto ora e avion di TUI a kaba di baha. E lugá di parker a yena hopi lihé, di moda ku outonan ku tabata yegando mester a para den rei. E echo ku outonan no tabata sali tabata e motibu ku e fila no tabata move, di moda ku e situashon a bira mas agudo.

Asta Kmar tabatin problema pa yega e lugá di parker pa via di e konglomerashon. Pa motibu di e fila largu a surgi tambe situashonnan di tráfiko kaótiko riba Bulevar EEG. Outonan ku kier a kita pa bai aeropuerto no por a hasi esei. Tambe tabata difísil pa haña un lugá pa para e outo otro kaminda.

E problema a empeorá pa motibu ku mas promé e aña aki a sera un parti di Bulevar EEG pa trabounan. Hopi bishitante di aeropuerto tabata stashoná nan outo riba e parti aki di kaminda, pero dor ku a ser’é esaki no ta posibel mas. Esaki ta hasi e kore kore pa stashoná outo na aeropuerto pió.