PHILIPSBURG- Djarason anochi St. Maarten kompleto a kai den shòk ora notisia a drenta ku tabata tin un kaso di tiramentu riba outo di e polítiko Olivier Arrindel di e partido Oualichi Movement for Change (OMC). Ounke e polítiko a sali ku algun leshon leve na promé bista, kasá di Arrindel sí a resultá mortalmente heridá, i a bin ta fayesé den e outo.

E suseso lo mester a tuma lugá den área di Cupocoy. Despues di e tiramentu, Arrindel a huy bai den direkshon di Sonesta Hotel na Maho Beach. Yegando einan Arrindel a kore drenta hotèl pero einan tambe a bin resultá ku e kasá no tabata duna señalnan mas di bida.

Ounke por bisa ku Arrindel ta un polítiko kontreversial na St. Maarten, ta promé biaha den historia di e isla ku un polítiko na kaminda pa un elekshon a wòrdu ataká di e forma aki, i pió kaminda un hende inosente a pèrdè su bida.

Promé informashonnan ta indiká ku un yu di Arrindel tambe tabata den e vehíkulo i ku esaki a sali ileso, pero ku lógikamente a keda totalmente troumatisá pa e eventonan dramátiko aki.