WILLEMSTAD – E kantidat di kiebro den kasnan a subi barbaramente den luna di òktober kompará ku e otro lunanan di e aña aki. Esaki por opservá for di e sifranan ku polis di Kòrsou ta duna tur siman.

E kantidat di keho di e asina yamá high impact-crimes, krímennan ku tin un impakto grandi, en general a subi konsiderablemente e último dos lunanan. For di un averahe di algu mas ku 100 den verano pa mas ku 175 den e último dos lunanan.

Kiebronan

Den luna di òktober tabatin mas kiebro den kasnan ku den lunanan di yüli, ougùstùs i sèptèmber huntu. Polis mester a presentá 65 biaha kompará ku 63 den verano. Luna pasá e kantidat a bira kasi dòbel, di 24 pa 44 kaso.

E kantidat di kiebro den negoshinan su averahe tambe a oumentá kompará ku e lunanan den verano. Tabatin binti kaso den òktober, ounke sèptèmber tabata na kabes ku 32 kiebro. E kantidat di kiebro den outo a oumentá un tiki ku 31 kiebro luna pasá.

Violensia relashonal

E kantidat di biaha ku polis mester a presentá pa kasonan di violensia relashonal tabatin un bahada positivo mei mei di luna di òktober, pero mientrastantu a bai bèk e nivel haltu atrobe. Luna pasá tabatin 36 kaso na tur i esei ta e averahe masoménos kada luna.