ORANJESTAD – E desishon di gobièrnu di Aruba pa para e ekonomisashon di 5,5% den sektor di kuido unilateral, lo influensiá e resultadonan di kompania di seguro AZV negativo. Aloménos si no tuma medidanan kompensatorio, pero ainda mester adaptá e presupuesto. Esei Kolegio di Supervishon Finansiero di Aruba ta bisa portal di notisia Noticiacla den un promé reakshon.

Gobièrnu a laga sa ku a informá tantu e Kolegio komo gobièrnu Hulandes di nan desishon, pero no a haña reakshon ainda di Hulanda. Esei lo mester sosodé otro siman, segun Noticiacla.

Minister Dangui Oduber: “Nos a informá e Kolegio di e desishon aki i a splika nan ku no tin base legal i hustifikashon mas pa mantené e ekonomisashonnan aki.”

Komprenshon

Riba su página di Facebook e minister ta splika ku e desishon ta konosí serka e Kolegio for di yanüari di e aña aki. Segun gobièrnu di Aruba e Kolegio a mustra komprenshon pa e situashon den kuido médiko. E komprenshon sinembargo a keda limitá te na e stap di e Ministerio di Salubridat i AZV pa atministrá e gastunan di kuido mihó i pa no  para e ekonomisashonnan den kuido.

Mester inkorporá e konsekuensianan presupuestario di e kambio aki den un presupuesto adaptá. E Kolegio ta evaluá e lei vigente pa pèrkurá ku gobièrnu di Aruba ta aktua segun normanan preskribí.