KRALENDIJK – Kolegio Ehekutivo di Boneiru (BC) a reakshoná asombrá riba e intenshon di Representante di Reino Jan Helmond pa via intervenshon direkto tuma over supervishon i mantenshon riba prosesadó di sushi Selibon, e fasilidat na Lagun. 

Den e karta fechá 13 di novèmber 2024 e Kolegio ta argumentá ku e medida, basá riba supuesto negligensia, ta hala e akshonnan pa mehorashon inhustamente un banda i ta opstakulisá un koperashon efektivo.

Segun e BC el a tuma, for di dia ku el a tuma posishon na luna di òktober 2023, diferente medida pa atendé ku e problemátika di sushi, manera nombramentu di un direktor nobo pa Selibon, inspekshonnan semanal i koperashon mas intensivo ku instanshanan Hulandes. E kolegio ta enfatisá ku a plania e siguiente pasonan kaba den koperashon ku entre otro e Servisio di medio ambiente NL.

No ta apropiá 

E Kolegio Ehekutivo ta deklará ku e intervenshon direkto (Fase 6) segun e kuadro di maneho pa negligensia di tarea no ta apropiá, ya komo Fase 3 (supervishon intensifiká) ta ofresé un plataforma mihó pa koperashon i kòntròl riba e medidanan tumá.

BC ta pidi e Representante di Reino pa sigui kontinuá ainda ku e koperashon aki bou di Fase 3, di moda ku por alkansá solushonnan duradero stap pa stap.