KRALENDIJK– Kolehio Ehekutivo di Boneiru djabièrnè atardi a hasi presentashon di nan proposishonnan pa kambionan dien prosupuesto di Gobièrnu, ku a mientrastantu manda pa konseho insular. Alabes  e diputadonan a duna un bista di tur e proyekto i idea ku ke traha riba dje. Ounke ku e di dos kambio di prosupuesto ta nesesario pa por kuminsá ku preparashon di sierto proyekto pa loke a sobra di e aña aki, hopi kos lo sigui kana òf lo haña mas forma durante e añanan 2025 i 2026.

Diputadonan Clark Abraham i Anjelica Cicilia durante e rueda di prensa ‘Bon Informá’ a repasá vários di e puntonan ku pa e kolegio ehekutivo aki ta konta komo prioridat. Ta trata di tres tema prinsipal, ku a wòrdu presentá tambe ora a yega na koalishon nobo na final di aña pasá: Un komunidat hustu, kresementu sostenibel i demokrashon i partisipashon.

Punto di akshon

E diputadonan a presentá pa kada un di e tres tema prinsipial un lista di punto di akshon pa kua ke krea espasio den e presupuesto. Pa loke ta trata e komunidat hustu esakinan ta inkluí -entre otro- inisiativanan pa kuido preventivo di salú, bienestar di bestia, ekspanshon di biblioteka i kampańanan riba sali sigur.

Pa loke ta trata kresementu sostenibel, Kolehio Ehekutivo ke pone énfasis importante riba diversifikashon di e ekonomia. “Nos ke enfoká riba turismo so, òf nos ke traha tambe riba otro pilarnan ku ta importante pa nos ekonomia?”, asina Abraham a puntra. Den e konteksto aki, lo bai kita stòf for di algun rapòrt ku ya ta eksistí pa mas ku trinta aña. “Nos tur konosé e gritunan di protehá kultura naturalesa i di Boneiru. Pero kiko nos a hasi konkretamente den añanan tras di lomba pa logra esaki?”. Pesei Kolehio Ehekutiva ke traha riba un vishon di termino largu pa aña 2050. “Kon nos ke pa nos isla ta na aña 2050? Kiko nos tin ku hasi? I tambe:  kiko nos no nester hasi e ora ei?” Abraham a puntra.

Pa loke ta demokrasia i partisipashon, Kolehio Ehekutivo ke garantisá ku hende grandi, pero tambe hubentut ta partisipá aktivamente den asuntunan di gobernashon. Tambe e Kolehio ke pone énfasis riba proyektonan pa motivá yu di  tera pa boble regresá Boneiru den futuro. 

Konseho Insular

Despues di e trabou preparatorio di e Kolehio Ehekutivo, awor ta turno di Konseho Insular pa studia e kambionnan proponé i pa wak kiko ta bai di akuerdo kuné pa aprobá e prospuesto kambiá. 

Abraham i Cicilia a enfatisá vários biaha ku e kambio di presupuesto ta nesesario pa duna un empuje na diferente proyekto e aña aki mes, ounke sea pa kuminsá pone riba papel kiko ke logra i kon por yega na realisashon di esaki durante añanan 2025 i 2026.