KRALENDIJK- Djárason Komishon Fiho pa Hustisia i Siguridat di “Tweede Kamer” a bishitá Konseho Insular di Boneiru. E tema prinsipal di e enkuentro aki tabata e provishonnan di yudansa legal e asina yama “Eerstelijns rechtshulpvoorziening” pa Boneiru, un tópiko di gran importansia pa e posishon legal di e habitantenan di Boneiru.

Durante e enkuentro, a papia ampliamente tokante e situashon aktual di e provishonnan di yudansa legal i e retonan ku Boneiru ta enfrentá. Miembronan di Konseho Insular a trese dilanti nan preokupashonnan i rekomendashonnan na e komishon, ku e enfoke riba kuminsá ku provishon di yudansa legal den forma di un lokèt hurídiko.

E enkuentro tabata unu positivo pa tantu e miembronan di Konseho Insular komo e miembronan di e Komishon di Tweede Kamer. Komishon Fiho pa Hustisia i Siguridat durante e kòmbersashon via diferente pregunta a risibí informashon pa usa komo preparashon pa e debate ku ministerio di hustisia I siguridat tokante yudansa legal pa Karibe Hulandes. Un resultado konkreto di e reunion akí ta ku lo formulá e puntonan i rekomendashonnan ku a keda presentá dor di e miembronan den un karta ofisial ku lo manda pa e Komishon Fiho pa Hustisia i Siguridat.

Kolaborashon

Konseho Insular di Boneiru ta spera di kontinuá ku un bon kolaborashon ku e komishon i tambe pa sigui vigilá e siguiente pasonan ku lo tuma pa garantisá e protekshon legal di e habitantenan di Boneiru.