KRALENDIJK- Miembro di Konseho Insular pa Partido Demokrátiko Boneriano (PDB) djamars anochi a bini dilanti ku un deklarason tokante e diskushonnan fuerte ku por nota últimamente tokante un supuesto òrtamentu den prespuesto di Tourism Corporation Bonaire (TCB).

Segun Hellburg-Makaai e ponensianan no ta kuadra ku realidat. “Desde 2022 te awor, TCB a risibí 2 mion dòler na supsidio tur aña. Kalke hende por kontrolá esaki den kuentanan anual di 2021 te ku 2023. Pa bisa ku a kòrta den supsidio ta un mentira pa malinformá nos pueblo. Kolegio Ehekutivo ni Diputado Abraham no tin poder pa kòrta supsidio; esaki ta un desishon di Konseho Insular”, asina Hellburg-Makaai ta bisa. 

E konsehal a sigui bisa di ta haña un duele ora skucha èks Diputado Thielman bisa ku a kòrta supsidio di TCB, pasobra e mester sa mihó. “Ta importante pa malinformashon no yega nos Pueblo. Partido MPB a vota PRO pa e supsidio di 2 mion tur aña. E presupuesto di 2024 ta kontené e mes 2 mion dòler, stipulá unánimemente pa Konseho Insular, inkluso MPB”.

Evaluá i oumentá

Ku e montante di 2 mion no ta sufisiente mas, nos sa! Nos mester pensa pa hisa e montante. E gobièrnu nobo ta dispuest evaluá i oumentá si TCB presentá un plan ku ta na bienestar di e sektor turístiko.