KRALENDIJK- Riba djaweps Konseho Insular a sera konosí ku sekretario nobo di relashonnan di Reino, señor Zsolt Szabó. Durante di e enkuentro, e sekretario a kompartí su eksperensia i impreshon ku el a risibí di Boneiru i otro islanan den Karibe, i tambe su puntonan di enfoke pa su kartera di relashonnan den reino.

E konsehalnan a risibí oportunidat pa kompartí puntonan di atenshon i tambe otro desaroyonan di e isla. A gradisí e sekretario pa echo ku e a bishitá e islanan asina trempan den su ròl komo sekretario.

Ameno i informal

Segun esnan present, e enkuentro di sera konosí tabata hopi ameno i den un esfera informal, kaminda tur dos partido a indiká di ta mira pa dilanti pa por traha na un manera konstruktivo den futuro ku otro.

Di parti di Kolehio Ehekutivo por a skucha sonidonan similar tokante nan enkuentro ku Szabó. “Nos por a interkambiá ku e sekretario di estado riba kosnan ku nos ta mira komo prioridat pa Boneiru, i tin hopi similiaridat den e lokualnan ku nos ta pensa ku lo mester mas prioridat pa nos isla”, segun diputado Clark Abraha a bisa.