Kralendijk- Siman pasá dunadónan di trabou i sindikatonan afiliá na e Konsulta di sektor Hulanda Karibense a sera un cao nobo. E kombenio di penshun ta parti di e cao akí. Pensioenfonds Caribisch Nederland ta ehekutá e kombenio di penshun.

Harald Linkels, presidente di Pensioenfonds Caribisch Nederland (PCN): “Ounke e cao ta solamente aplikabel pa ámtenarnan di Gobièrnu Sentral, e kombenio di penshun ta konta pa tur dunadó di trabou i trahadó ku ta afiliá na PCN. Bou di esei ta kai e sektornan di kuido i enseñansa, pero tambe algun otro dunadó di trabou.

Ta importante pa enfatisá ku e demas palabrashonnan stipulá den e cao nobo ta konta solamente pa ámtenarnan di Gobièrnu Sentral.” Motibu pa adaptá e kombenio di penshun ta e interes abou. Pa e motibu akí e gastunan di akumulashon di penshun a oumentá konsiderabel. Sin den 2010 ainda por a tuma komo punto di salida un interes di 4%, esei ta awor alrededor di 1%. Esei ta nifiká ku mester paga mas prima pa konstruí e mes penshun. Huntu ku esei tin un prima máksimo di 22% di e salarionan na vigor. Esei ta nifiká ku trahadónan ta traha alrededor di un dia den siman pa nan penshun.

Gastu

Pa tene e gastunan pa penshun bou di kontrol dunadónan di trabou i sindikatonan a skohe pa un adaptashon di e kompromiso di penshun. Di awor pa dilanti ta konstruí penshun solamente te un salario di $47.500. Ta baha e porsentahe anual di akumulashon di 1,75% na 1,71%.

Entrante 2030 e edat di penshun ta subi ku un aña na 66. Ta keda posibel pa adelantá e penshun pa e edat di 60 òf pa posponé te e edat di 70. Un agregashon importante ta ku si tin mester di ménos ku e prima máksimo di 22% pa akumulashon di penshun, ta reservá un parti di e prima pa periodonan den kua tin mester di mas prima. Di otro banda ta keda posibel pa – si ta nesesario – redusí e akumulashon di penshun di 1,71% pa sòru ku e prima no ta suma mas ku e prima máksimo.

Konsekuensia

“E palabrashonnan nobo tin konsekuensia pa e atministrashon di penshun i e resúmennan di penshun pa partisipantenan. PCN lo hasi kalkulashonnan definitivo promé pa evaluá si e prima máksimo ta sufisiente pa e kompromisonan nobo di penshun. Despues ta kalkulá e primanan di penshun i e konstrukshon di penshun pa 2021 di nobo. Esaki ta un operashon basta pisá pa PCN i direktiva ta reuní na yüni tokante tur konsekuensia i e skema di tempu denter di kua por implementá e kombenio nobo di penshun” asina Linkels a bisa.

Linkels a primintí tambe ku di parti di PCN den e lunanan benidero lo informá tantu dunadónan di trabou komo partisipantenan tokante e kambionan.”