KRALENDIJK – Riba djaweps 23 di mart a tuma lugá un kòntròl di tráfiko planiá riba Kaya Internashonal durante oranan di anochi. Durante e kòntròl aki a para i kontrolá na tur 13 vehíkulo. Lamentablemente a duna 11 prosèsverbal pa diferente faltamentu ku regla.

A duna but na shete shofùr ku no a bisti faha di seguridat, tres pa kore sin seguro bálido i un pa kore sin hèlmu. Bistimentu di faha di seguridat ta di gran importansia pa seguridat di e okupantenan. Un faha di seguridat ta pèrkurá ku e okupante ta keda riba su stul, ta evitá ku e ta dal ku su kabes kontra di e winshil i ta evitá ku e persona ta keda bentá for di e outo. Bistimentu di faha di seguridat ta minimalisá e chèns riba un aksidente fatal konsiderablemente. Pasaheronan ku ta sinta riba stul patras tin ménos chèns riba leshon grave si nan bisti faha di seguridat.

Ignorá reglanan di tráfiko por kondusí na but. E haltura di but pa e faltamentu di reglanan menshoná ariba ta varia entre $30 i $225.

A detené homber di 21 aña pa korementu bou di influensia

Djaweps 23 di mart den oranan di madrugá a detené un hòmber di 21 aña ku e inisialnan O.v.K. pa motibu di korementu bou di influensia. E sospechoso tabata kore riba un skuter i a par’é pa un kòntròl rutinario. E no por a mustra un reibeweis bálido ni un prueba di seguro i a haña un prosèsverbal pa esaki. Tambe a hasi prueba di supla i despues a hib’é warda di polis pa un análisis di aliento. E sospechoso a haña un prohibishon pa kore di un ora.

Ignora òrdu di polis ta kondusí na detenshon.

Djarason 22 di mart alrededor di 3’or di madrugá a detené un hóben di 17 aña ku inisialnan R.R.D.na Amboina. E sospechoso a nenga vários biaha òrdu di polis pa para pa un kòntròl, mientras ku e tabata kore ku su outo den direkshon prohibí. Despues di un persiguishon kòrtiku a detené e sospechoso finalmente pa motibu di no sigui òrdu di polis. A hiba e outo warda di polis.