KRALENDIJK- Djabièrnè 23 di ougùstùs, e Komishon Fiho di Hustisia i Siguridat di Tweede Kamer, bou di guia di Sra. Ingrid Michon-Derkzen, a hasi un bishita di trabou na Kuerpo Polisial Hulanda Karibense (KPCN). E komishon aki ta evaluá i supervisá e maneho rondó di hustisia i seguridat.

E hefe suplente di kuerpo, Rob Meijer a risibí e miembronan. Durante e bishita a trata diferente tópiko, entre otro e kapasidat di e kuerpo, partikularmente e falta di personal di e departamentu di Kuido Básiko di Polis i di Reshèrshi, e kolaborashon ku partnernan i puntonan difísil i retonan ku e kuerpo regularmente ta enfrentá.

Presentashon

Tambe nan a haña un presentashon di e unidat di Krímen Sibernétiko ku a duna un bista kiko e unidat ta hasi i kon esaki ta funshoná. Finalmente, nan a haña un rekorido den e edifisio na unda a para ketu un ratu na e ‘meldkamer’ sentral nobo.