KRALENDIJK – Na kuminsamentu di aña, Kuerpo Polisial Hulanda Karibense a risibí notifikashon di un posibel kaso di froude den un kompania di hür situá na Kaya Internashonal. E kompania aki ta atendé ku hür di bibienda na nòmber di e doñonan tantu pa plaso largu komo kòrtiku (di fakansi). Esaki tabata motibu pa e tim di Kriminalidat Finansiero Ekonómiko resientemente fundá a inisiá un investigashon pa motibu di e notifikashon. For di e investigashon a resultá ku tin sufisiente motibu pa sospechá froude i falsifikashon.  

Riba djaluna, 10 di òktober 2022, bou di guia di hues komisario i Ministerio Públiko, e tim di FinEC den kolaborashon ku e tim di Investigashon Digital (TDO) di KPCN a ehekutá un búskeda den ofisinanan di e kompania, den bibienda di e doño (anterior), den un kònteiner i un ofisina di atministrashon konektá ku e kaso. Ademas a konfiská vários dokumento di atministrashon i a sigurá pista digital. E tim di FinEC ta sigui ku investigashon di e kaso. 

Kresementu i desaroyo mundial riba tereno finansiero, i huntu ku esaki tambe desaroyo den kriminalidat finansiero, ta pidi desaroyo di konosementu i mas kolaborashon den e retnan riba tereno di Kriminalidat Finansiero Ekonómiko (FINEC). Kuerpo Polisial Hulanda Karibense tambe a lanta e unidat di FINEC huntu ku ‘taakaccent houders’ i ta spera di fortalesé reshèrshi finansiero i hasi Hulanda Karibense mas seif dor di e desaroyo aki.