KRALENDIJK- Maarten van der Scheer, direktor di BIA, ta konstatá un oumento remarkabel di e kantidat di buelo i pasahero na e aeropuerto, i partikularmente for di destinashonan norteamerikano.

Segun van Der Scheer a bisa, e desaroyo faborabel tin tur kos di haber di trahamentu huntu ku otro partnernan den e arena turístiko. Esaki e direktor di BIA a bisa siman pasá durante e promé Tourism Update di aña 2024. 

“Nos esfuersonan konhunto pa atraé mas tráfiko aéreo for di Nortamérika a dunando hopi bon resultado. Asta den un ambiente sumamente kompetitivo nos a logra oumentá e sifranan akí den liña ku e Plan Stratégiko pa Turismo”. 

Van der Scheer a mustra ku den e promé kuartal e kantidat total di pasahero na Aeropuerto Flamingo a subi en total  ku 6,8% kompará ku e mesun periodo na aña 2023. Den esaki, e kantidat di pasahero internashonal a subi ku 7,8%, miéntras ku e kantidat di pasahero entre e islanan o sea regional a subi ku 4,3%. 

Mehorashon

Van der Scheer a mustra su mes orguyoso tambe di e instalashon resien di un kapa pa protehá pasahero ku ta yega Boneiru kontra di e elementonan manera awa i solo. 

“Resientemente nos a selebra inougurashon di un kapa nobo pa tapa solo i áwaseru na momentu di yegada, un proyekto pa mehorá eksperensia di pasahero”. 

Segun van der Scheer den 2024 lo sigui ehekutá diferente proyekto di mehorashon, entre otro konstrukshon di un parke solar, realisashon di un sistema nobo di iluminashon na aeropuerto i instalashon di rutanan nobo di siguridat.”