KRALENDIJK – Ora ta wak e statistiknan di aña 2023, kriminalidat na Boneiru ta mustra un tendensia bahando. Apesar di e echo ku e poblashon ta kresiendo, i ku tin mas turista yegando e isla, práktikamente riba tur tereno tin sifra mas abou.

E informashon aki a sali na kla durante e presentashon pa Korps Politie Caribisch Nederland (KPCN) riba djaweps. E kousa eksakto di e tendensia bahista aki no semper ta kla, asta pa KPCN mes. Sinembargo, un kantidat kresiente di agente polisial kombiná ku un tasa hopi abou di desempleo na e isla sigur ta dos faktor ku ta kontribuyendo positívamente na e sifránan di kriminalidat.

Un forma di krímen hopi molesto i daniño pa turismo, esta ladronisia na diferente sitio di buseo, a baha fuertemente pa un total di no mas ku dos kasonan durante henter 2023. Tambe ladronisio di kabritu, ladronisia na kompania i ladronisia di baiskel a baha. Na otro banda, tabata tin mas kaso di vehíkulonan motorisá ku a wòrdu hòrtá, ta tin mas kaso di ladronisia for di tereno, i tabata tin mas intento di ladronisia kompará ku añanan anterior.

E kantidat di kaso di ladronisia na kas di hende tambe a baha hopi, ku un 50% kompará ku aña 2020. E tendensia bahista por mira kaba pa vários aña tras di otro. KPCN spesífikamente pa loke ta trata e tipo di ladronisia aki, ta mira aki un efekto di mihó prevenshon, kaminda habitantenan ta kumpra slòt di mihó kalidat, i tambe na vários kaminda a pone kámara di seguridat.

Na 2023, tabatin 6 kasonan di ladronisia ku violensia, di kual den kos kaso bou di menasa ku un arma.  

Maltrato

Kontrali na e sifranan faborabel pa loke ta trata delito di propiedat, tabatin mas kasonan di maltrato na 2023. Na tur, tabatin 206 kaso di maltrato. Di e kantidat aki, den 69 di e kasonan aki tabata trata di violensia na kas. Tambe ten un leve oumentu di kaso di maltrato di mucha, pero e sifranan den forma apsoluto no ta hopi haltu.

E kantidat di asesinato na Boneiru ta hopi stabil. Na aña 2020 i 2024 tabata tin un solo kaso di asesinato. Na 2021 i 2022 no tabatin niun kaso di asesinato. 

E kantidat di delito seksual  tambe ta mustra un tendensia subiendo, ku un total di 28 kaso, kasi dòbel mas haltu ku den añanan anterior.

Satisfecho

Hefe di KPCN, Alwyn Braaf, ta mustra su mes basta satisfecho ku e sifranan di e aña tras di lomba. “Ora ta trata di kualke tipo di krímen, semper ta zona un poko straño pa bisa ku bo ta satisfecho. Pasombra, kada kaso ta un kaso di mas,” asina Braaf a bisa riba pregunta di e periodiasta di ABC Onlien Media si e ta sinti su mes satisfecho ku e sifranan. Esaki no ta kita ku e hefe di KPCN ta kontentu ku e diferente sorto di krímen na e isla ta mustra un tendensia bahando.