KRALENDIJK – Kuerpo di Konseho pa kumplimentu ku Lei ta krítiko riba kombatimentu di korupshon na Karibe Hulandes,  spesialmente na Boneiru, i ke mas atenshon di gobièrnunan pa un kantidat di komponente  mirando e riesgonan ku a señalá.

E Kuerpo di Konseho a investigá kon a kumpli último añanan ku su rekomendashonnan di e rapòrt di 2015 “Infrastructuur Corruptiebestrijding op Bonaire, Sint Eustatius en Saba”.

E rapòrt ta komentá riba e karákter i nivel di korupshon atministrativo i e desaroyo di e maneho di integridat di e entidatnan públiko Bonaire, Sint Eustatius i Saba.  Di e maneho di integridat mester sali un akshon preventivo pa evitá korupshon. E Kuerpo di Konseho a mustra tambe kon leu a manehá pa kumpli ku e rekomendashonnan di e rapòrt anterior. Por ehèmpel pa medio di e ministerio di Hustisia i Seguridat (JenV). E Kuerpo di Konseho a yega na algun konklushon.

Strategia

E entidatnan públiko Bonaire, Sint Eustatius i Saba ta trahando, kada un na nan manera, riba e maneho di integridat. Nan a dal sierto pasonan kaba. E Kuerpo di Konseho ta señalá sinembargo vários riesgo di integridat ku ta motibu pa preukupashon. Manera falta di reglanan kla i maneho tokante emishon di tereno na Bonaire. For di 2018 kaba Rishèrshi di Reino a hasi rekomendashonnan konkreto pa stipulá reglanan i maneho definitivo pa loke ta trata emishon di tereno. Mas ku kuater aña despues no a konkretisá esaki ainda na Bonaire. Konsekuentemente ta eksistí ainda riesgonan di enrikesimentu personal, despotismo i komportashon no-íntegro. E ofisina di integridat ku a instituí dentro di entidat públiko Bonaire ta eksperensiá resistensia i insufisiente respaldo pa ehersé su tareanan. No ta stimulá nan na  ora di mèldu  iregularidat, komportashon no-íntegro, i asta ta pone traba pa nan.

Registro di tema

Pa haña un mihó bista di karákter i nivel di korupshon atministrativo, por prosesá informashon den un asina yamá registro di tema. For di 1 di yanüari 2020 esaki lo a bira posibel pa Karibe Hulandes tambe. Minister di Hustisia i Seguridat a primintí  Tweede Kamer esaki. E Kuerpo di Konseho ta konstatá sinembargo ku pa medio di un fout den e proseso di lei serka ministerio di Hustisia i Seguridat esaki no ta pèrmití pa Karibe Hulandes. Konsekuentemente no por papia ainda di konstruí un posishon di informashon strukturá pa por identifiká korupshon atministrativo. A pèrdè tempu balioso. 

E investigashon di e Kuerpo di Konseho ta demostrá si ku e presensia permanente di Rishèrshi di Reino na Karibe Hulandes, ku sede na Bonaire, ta kontribuí na haña un bista di e karákter i nivel di korupshon atministrativo.

Lei Bibob

Mas aleu for di e investigashon ta resultá ku tin insufisiente progreso  den e asina yamá proyekto piloto Bibob (Bevordering integriteitsbeoordelingen door het openbaar bestuur), ku tin años kaba ta kanando. Falta  di un variante di Bibob ta stroba e resistensia di e atministashon lokal i ta trese den e tempu aki mas i mas, i spesialmente na Bonaire, riesgonan di labamentu di plaka. Ademas esaki ta pèrhudiká e konfiansa di e siudadano den gobièrnu.

Rekomendashonnan 

E Kuerpo di Konseho ta dunando awor vários rekomendashon na e minister Hulandes di Hustisia i Seguridat. Entre otro mester mehorá e kòntròl hasí pa e ministerionan di Hustisia i Seguridat  i di Asuntunan Eksterior i Relashonnan di Reino (BZK).

Tantu e minister di Hustisia i Seguridat komo e minister di BZK a indiká den nan reakshon riba e rapòrt ku nan ta suprayá esei i a reanudá e ròl di kontrolá. Lo tene en lo futuro reunionnan periódiko ku e organisashonnan konserní. E kambio di lei ku ta nesesario  pa prosesamentu di tema pa Karibe Hulandes lo drenta na vigor te na 1 di yanüari 2024.

E ministerio di BZK lo bai sostené e entidatnan públiko kaminda ta nesesario i posibel ku e diseño  i ehekushon di e maneho di integridat. E ministernan ta duna di konosé tambe ku den komienso di aña 2023 nan lo informá Tweede Kamer di e situashon aktual  pa loke ta trata kumplimentu ku e rekomendashonnan di e Kuerpo di Konseho. Minister a manda e rapòrt di e Kuerpo di Konseho huntu ku su reakshon pa Tweede Kamer. E rapòrt di inspekshon di e Kuerpo di Konseho i e reakshon di e minster ta públiko. Por lesa nan riba e sitio web di e Kuerpo di Konseho:                                                                       www.raadrechtshandhaving.com