WILLEMSTAD – E kantidat di ladronisia di outo den luna di novèmber tabata mas ku dòbel kompará ku e luna anterior. Si e tempu ei ladronnan a bai ku shete outo, e luna aki e tabata djesseis, asina sifranan ku polis ta publiká semanalmente ta mustra.

E kantdat di kiebronan den kas a baha konsiderablemente. Di 65 luna pasá pa 28 e luna aki. E raportahe di polis ta te ku 27 di novèmber, pues algu mas ku un kiebro pa dia. 

Kiebronan di kas na Kòrsou no ta tuma lugá anochi, manera hopi hende ta pensa, pero entre 11’or di mainta i 3’or di mèrdia.

E kiebronan den negoshinan tambe a baha, di binti den òktober pa ocho e luna aki. E ladronnan ta preferá anochi i mainta tempran pa drenta e establesimentunan.

E sobrá sifranan ta indiká ku ta kibra i drenta un outo promedio pa dia riba e isla. Den òktober esaki tabata meskos.

Violensia relashonal

Den luna di novèmber a mira un bahada tambe den e kantidat di biaha ku polis mester a aktua pa violensia relashonal.

Bintiun biaha e luna aki i esei ta konsiderablemente ménos ku e último tres lunanan ora ku polis mester a intervení promedio 38 biaha pa luna.