WILLEMSTAD – Fakultat General di Universidat di Kòrsou ta kuminsá e aña aki atrobe ku un aña nobo di  Lerarenopleiding Funderend Onderwijs, LOFO. 

E formashon pa dosente aki ta forma studiantenan pa Bachelor of Foundation Based Education anto ta operashonal na Kòrsou i Boneiru for di e aña di kolegio 2006-2007

Na Boneiru mientrastantu ta ofresé e kurso aki den blended vorm, loke ta nifiká ku ta duna e lèsnan parsialmente via internèt i parsialmente na e edifisio di e Universidat na Boneiru. 

Fushon

A konsekuensia di un fushon ku Akademia Pedagógiko Kòrsou, a reforsá den kurso di 2008 e Fakultat General ku dosentenan eksperensiá di e anterior instituto pa formashon.

E tim di dosente di LOFO a logra pa entregá un kantidat grandi di dosente pa enseñansa di fundeshi, ku no ta funshonando satisfaktoriamente na Kòrsou i Boneiru so, pero tambe na Hulanda. 

Sierto studiante ku a finalisá nan estudio ta skohe pa sigui studia, sea lokal òf den eksterior. LOFO ta traha konstantemente na mehorashon i inovashon di e kurso, lokual ta perkurá pa formashon aktual i ta hasi e konekshon den otro pais mas fásil.

Akreditashon

E kurso di dosente pa Enseñansa di Fundeshi ta logra pasa kada seis aña e prueba di e instituto pa akreditashon NVAO, de Nederlands Vlaamse Accreditatieorganisatie. Ku e resultado positivo i e konsehonan di dos bishita anterior di NVAO na tur dos sitio, tantu Kòrsou komo Boneiru, a traha e último añanan na un desaroyo mas amplio di e kurso.