KRALENDIJK – Luzina de Greef-Mattemaker, ku a nase i lanta na Boneiru, a tuma e martin di presidente di Hunta di Maneho di Korte Komun di Hustisia entrante 1 di yüli 2023. E korte aki ta sirbi Aruba, Kòrsou, Sint Maarten, Boneiru, Sint Eustatius i Saba.

De Greef-Mattemaker, ku for di 23 di yüni 2021 tabata miembro kaba di Hunta di Maneho pa Aruba, tin un karera impreshonante tras di lomba komo hurista fiskal i konsehero di impuesto, segun  Korte Komun.

E ta fundadó i sosio di un ofisina di konseho di impuesto prominente na Aruba i tin, segun e mes ta bisa, eksperensia ámplio den diferente funshon atministrativo. Segun Korte Komun e ta bon ekipá pa tuma e enkargo nobo aki, mirando e ret ámplio ku el a desaroyá durante su karera.

E ta sigui Hans Janssen, ku nan a nombra 16 di febrüari 2016 i ku nan a bolbe nombra na 2021 pa un di dos periodo. Ounke e ta traspasá e presidensia, Janssen ta keda miembro di Hunta di Maneho te na momentu ku apuntá un miembro nobo pa Boneiru, Sint-Eustatius i Saba.

E Hunta di Maneho ta un parti esensial di Korte i, banda di ta doño di trabou di e ámtenarnan di Korte, e tin un ròl di supervishon tambe riba gerensia i kumplimentu ku e plannan anual. E hunta ta hiba ademas diálogo i negosashonnan pa presupuesto i ta supervisá e maneho finansiero di Korte.

E tim di Hunta di Maneho ta konsistí di kuater miembro, un pa kada pais kaminda Korte ta brinda atministrashon di hustisia: Aruba, Hulanda (pa Boneiru, Sint-Eustatius i Saba), Kòrsou i Sint-Maarten. Señora de Greef-Mattemaker tin pues no solamente un posishon importante pa Boneiru, pero ta representá de fakto tambe interesnan di e otro paisnan menshoná.