KRALENDIJK – Luna pasá Koninklijke Marechaussee a detené 2 persona na Aeropuerto Internashonal di Boneiru riba sospecho di trafikashon di hende. 

E sospechosonan ta 2 hende hòmber di 34 i 49 aña. Ta trata di 2 kaso separá ku no ta relashoná ku otro. A detené un sospechoso dia 21 di yüli i esun otro dia 23 di yüli.

Kada 1 di e sospechosonan a bini buska un pasahero for di Suramérika na aeropuerto riba e fecha nan menshoná. E 2 pasaheronan for di Suramérika a mèldu nan mes serka Koninklijke Marechaussee komo turista, pero despues di kontròl tabata tin sospecho fuerte ku e Suramerikanonan a bini Boneiru pa traha di forma ilegal pa e personanan ku a bin buska nan. Ningun di e Suramerikanonan no tabata disponé di e pèrmit di trabou nesesario.

No ta permití pa yuda pasaheronan drenta Boneiru di forma ilegal. Sa pasa mas biaha  ku abitantenan no ta bon na altura di e kondishonnan ku ta nesesario pa laga un estranhero traha di un manera legal na Boneiru. Esaki por kondusí na sospecho di trafikashon di hende manera menshoná den Kódigo penal BES.

Kanando

E investigashonnan pa loke ta trata e 2 sospechosonan ainda ta kanando, bou di guia di Ministerio Públiko. E sospechosonan a ser poné den libertat durante e investigashon.