KRALENDIJK- Resientemente a entregá diploma di e estudionan Dienstverlening, Kinderopvang, Media i Persoonlijk begeleider specifieke doelgroepen. Graduadonan di e último estudio akí ademas a risibí un medaya ku nan nòmber i e palabra ‘perseverance’ riba dje. 

“Studiantenan di e estudio di dos aña akí a demostrá sumamente hopi perseveransia”, Liset de Keijzer, direktor di unidat MBO Bonaire, ta splika. “Algun di nan tabata asta sali derechito for di warda di anochi bini skol.” 

E studiantenan a duna muestra di un gran apresio mutuo, ora ku nan a entregá nan dosente, Carolien Cicilia, un bunita regalo i a mustra un vidio kaminda nan a ekspresá gratitut pa e manera ku semper e dosente tabata kla pará pa nan. Djárason 6 di yüli a entregá diploma na e estudionan Bouw en Techniek, Zakelijke Dienstverlening, Sport en Bewegen i Horeca. 

Aselerá

Durante e entrega tabatin èkstra atenshon pa 12 studiante ku a terminá nan estudio den tempu aselerá. E trayekto akí di trabou personalisá ta eksiguí èkstra esfuerso di e studiante i e dosente. Pa e motibu ei MBO Bonaire a entregá un trofeo spesial na e gran trahadónan akí. 

MBO Bonaire ta felisitá tur graduado ku e logro akí i ta deseá nan masha hopi éksito ku tur nan siguiente pasonan.