KRALENDIJK – For di mart 2020, un pakete di medidanan di emergensia ta na vigor na Hulanda Karibense dor di e konsekuensianan ekonómiko di vírùs di corona. Un total di kasi mitar di  kompanianan a hasi uso di e apoyo finansiero pa gastunan di salario i gastunan fiho den 2020. Esaki ta resultá for di sifra nobo di CBS.

Di e kompanianan na Hulanda Karibense, 45 porshento na Boneiru, 55 porshento na Saba i 47 porshento na Sint Eustatius a hasi petishon pa apoyo di gobièrnu pa kubri gastunan di salario i/o gastunan fiho.

Doñonan di trabou a hasi petishon pa kubri gastunan di salario pa 4020 kupo di trabou. Den e kaso aki ta trata di trabounan di trahadónan i tambe di empresarionan independiente. E gran mayoria di e petishonnan aki a bini di e sektor di hóreka. Den e sektor aki, 200 kompania a risibí apoyo pa 1290 kupo di trabou, di kual kasi tur ta na Boneiru (1190). Den e sektor komersial, 200 kompania a hasi petishon pa e pakete di emergensia. Nan a risibí apoyo pa kubri gastunan di salario pa 500 kupo di trabou. 

Fuentenan

Tabèl – Grandura di e Pakete di Emergensia relashoná ku vírùs di corona na Hulanda Karibense, 2020 (Tabel – Omvang Noodpakket Coronavirus Caribisch Nederland, 2020): https://www.cbs.nl/nl-nl/maatwerk/2021/13/omvang-noodpakket-coronavirus-caribisch-nederland-2020