WILLEMSTAD – Durante un aksidente na Koraal Partier djasabra último tabatin un morto. Ta trata di  Sherman Ceferino Marceli di 64 aña.

E aksidente di tráfiko a tuma lugá na e krusada kaya Hensley “Bam Bam” Meulens i kaya Harmonia, net dilanti di e salida pa bai Ronde Klip.

Ta konosí ku ta kore duru riba e kaminda pa bai Santa Catharina. Pa outomobilistinan ku ta subi e kaminda prinsipal e bista na e krusada aki no ta bon pa motibu di mal mantenshon di e matanan ku ta krese kantu di kaminda.

Tres outo tabata embolbí den e aksidente aki i a hiba dos víktima ku urgensia sala di emergensia na CMC.

Ayera mainta, djaluna 20 di febrüari polis a haña e notisia ku un dje víktimanan a fayesá a konsekuensia di e leshonnan risibí. Esaki ta bira e promé morto di tráfiko pa 2023 na Kòrsou.