KRALENDIJK – Movementu di Pueblo Boneriano (MPB) den un karta skèrpi i na su punto riba djaweps a hasi un apelashon riba gezaghèber Nolly Oleana pa duna klaridat, i asumí un posishon pa loke ta trata e relatio di prensa ku a wòrdu publiká na nòmber di konseho insular i na unda prensa ta wòrdu kritiká. 

“Nos ta distansiá nos mes kategórikamente i apsolutamentedi e ‘komunikado pa prensa’ ku a keda publiká riba wèpsait di Konseho Insular kontra tur regla vigente di prosedimentu i sin outorisashon di Konseho Insular. Pa loke ta trata kontenido tambe e komunikado pa prensa ta inapropiá den un forma sin presedente: e ta spekulativo, intimidante (den direkshon di empleadonan di Entidat Públiko Boneiru) i ofensivo pa tur medio di komunikashon lokal ku ta inapropiá pa gobièrnu públiko”, asina líder di frakshon Humphrey ‘Junny’ Wout ta skirbi den e karta pa gezaghebber Oleana.

MPB ta skibi tambe ku debidamente nan ta kompartí e preokupashon tokante e posibel lèkmentu di korespondensia konfidenshal den e organisashon di Entidat Públiko Boneiru (OLB), pero nan no por kita e impreshon ku por papia di un ‘atenshon selektivo’ di un parti di Konseho Insular tokante e asuntu aki. Entre otro MPB ta mustra ku ora, aña pasá a saka asta informashon finansiero di sierto hende, tampoko a kore hasi investigashon. 

“Frakshon di MPB no por evitá e impreshon ku intenshon di e komunikado ku a keda publiká dia 8 di aprel último riba wèpsait di Konseho Insular ta pa lanta un kòrtina di huma motivá polítikamente pa kita bista for di un grefir interino ku kada biaha di nobo ta mina outoridat di Konseho Insular ku su aktuashon terko i segun su propio kièr”, e karta di Wout ta sigui bisa.

Investigashon independiente

Frakshon di MPB ta skibi tambe na gezaghèber ku nan di opinion ku kalke investigashon ku ta tuma lugá lo mester wòrdu hasí pa un büro spesialisá i den todo kaso no pa e grefir interino Arjen de Wolf. De hecho, pa frakshon di MPB lo mester skòrs De Wolff no solamente pa e echo ku e ta saka relato di prensa na nòmber di Eilandsraad sin aprobashon previo, pero tambe e echo ku parse ku ela drenta den sierto informashon konfidensial di e miembronan di Konseho Insular i ku e ta operá di un forma terko i sin outorisashon. 

Banda di esaki frakshon di MPB ta pidi gezaghebber Oleana pa den un reunion públiko deklará públikamente ku libertat di prensa ta esensial pa un bon funshonamentu di e òrdu demokrátiko na Boneiru. 

Frakshon di MPB pa medio di su karta a hasi vários pregunto por eskrito na gezaghèber, ku e súplika pa preferiblmente kontestá esakinan den 7 dia di trabou.