KRALENDIJK – Movementu di Pueblo Boneriano (MPB) pa boka di Milena Winklaar ta boga pa mas iportashon for di nos pais besino, Venezuela, den un intento pa frena subida di preis di primeramente kuminda. 

“‘Ta un echo ku preis di kuminda a subi mundialmente den e último añanan i esei no ta den nos man. Un solushon ku sí ta den nos man ta pa habri posibilidat pa mas tantu produkto por drenta for di Venezuela”, asina Winklaar ta bisa

Winklaar ta nota tambe ku un aña a pasa kaba ku frontera ku Venezuela a habri bèk pa por importá fruta i bèrdura. E idea e tempu ei tabata ku lo a evaluá kon esaki ta bai i sigui amplia e posibilidat pa importá mas produkto for di Venezuela. “Entretantu na Aruba i Kòrsou sí por importá hopi mas produkto for di Venezuela. Dikon esaki no ta e kaso na Boneiru ainda? Nos ta papiando di produkto manera keshi, karni i piská i tambe kuminda pa bestia pa kunukeronan. Un otro pregunta ku ta biba ta dikon e barkitonan por bende solamente ku kompania di benta por mayor i no direktamente ku e konsumidó”, asina Winklaar ta puntra.