KRALENDIJK – Tourism Corporation Bonaire (TCB), den koperashon ku Bonaire Hotel & Tourism Association (BONHATA), dia 27 di sèptèmber 2021 riba Dia Mundial di Turismo a organisá su promé Bonaire Tourism Summit – Kongreso di Turismo Boneiru na Courtyard by Marriott.

TCB a introdusí e plataforma akí pa promové koperashon entre tur stakeholder turístiko. Koperashon ta un prioridat pa TCB pa progresá awor ku nos a kuminsá rekuperá, ku nos ta rekonsiderando ròl di turismo i ku nos ta okupá nos mes ku reedifikashon di un industria mas mihó, mas sano i mas resiliente. Durante e kongreso TCB a ilustrá su vishon riba desaroyo turístiko ku un presentashon titulá: ‘Boneiru, un komunidat resiliente – Transformando nos hendenan i nos komunidat’. Nos enfoke ta riba desaroyo di un industria di turismo inklusivo, kaminda nos ta dirigí nos mes riba un volúmen abou, márgen haltu i eksperiensianan basá riba balor ku ta forma partí di nos DNA kultural i komunitario. TCB a duna un bista di e puntonan mas prinsipal di su strategia pa hasi progreso ku posishonamentu di nos isla meimei di kompetensia mundial a base di DATA i a deskribí algun desafio importante ku e sektor ta konfrontá na e momentu akí.

CEO di TCB, Miles Mercera a bisa: “Ta un kapítulo nobo pa nos, despues di un aña yen di reto nos a usa e paro akí pa inventá nos mes di nobo. A renobá i ampliá hotèlnan i nos a yama empresanan nobo bon biní na nos isla. Miéntras nos tabata trahando riba kreamentu di programanan nobo pa sostené nos komunidat lokal i pa hasi esfuerso di nobo pa sostenibilidat, nos isla mes tambe a rekuperá den un forma natural. Den hopi sentido pues e periodo akí tabata unu di preparashon, embeyesimentu i oportunidat. Nos ta evolushoná, pero nos ta hasi esei harmoniosamente – nos no ta kambia e outentisidat i bunitesa puru ku ta hasi Boneiru, Boneiru.”

Mas aleu e kongreso a yama bon biní na e ‘keynote speaker’ internashonal Igor Beuker ku a splika su vishon riba desaroyo ekonómiko i inovashon. Siguí pa Jody Diamond, direktor di Diamond Public Relations (Boneiru su kompania di relashonnan públiko), kende a papia tokante nos strategia komo destinashon i tokante nos resultadonan i akshonnan pa move padilanti despues di covid. Relashonnan Públiko ta un parti fuerte di e strategia internashonal di posishonamentu di Boneiru. Señor Howard Mann, ku ta forma parti di e tim di desaroyo pa servisio di aviashon, tambe a kompartí algun idea tokante desaroyonan i trèntnan mundial riba tereno di aviashon i tokante kon TCB huntu ku su stakeholdernan ta invertí den futuro posibilidatnan di desaroyo pa servisionan di aviashon.

Señor Rene Paalman tambe a forma parti di e lista ku oradornan ku a dirigí nan mes riba e parti mas importante di nos industria di turismo, esta nos hendenan i e mentalidat di ‘Spirit2Serve’. Inovashon sosial (empresariado sosial) ta forma parti di nos plan di rekuperashon pa turismo, di kua Rene a ilustrá e puntonan prinsipal. 

E stakeholdernan turístiko di TCB tambe a haña oportunidat pa duna nan aporte na e inisiativanan di merkadeo di Boneiru na aña 2022 ku seshonnan di ‘break-out’ interaktivo ku a wòrdu di host dor di Claire Sealy, Donna Hudgeon, Elesiër Angel, Veroesjka de Windt i Orlando Fransisca.

TCB i BONHATA ke gradisí tur partner ku a sostené e kongreso i ku a partisipá na esaki. Nos lo sigui utilisá nos tempu i energía pa realisá tur meta i inisiativa ku a akordá durante e kongreso.

Si bo no por a sigui nos Bonaire Tourism Summit, bishitá e ora ei e Facebook página lokal ‘Tourism Corporation Bonaire’ di TCB pa e livestream vídeo.