KRALENDIJK- E restorant Ocean Oasis, situá na Punt Vierkant a haña doño nobo den persona di Pascal Beeren i David Landman.

Segun e doño nobonan e área rondó di Ocean Oasis ta kresiendo rápidamente i tin hopi espasio ainda pa sigui krese. “E lokalidat aki tin tur kos den dje pa e bira un ‘hotspot’ luhoso, pero kedando aksesibel pa un i tur na mes momento”, asina David Landman a skibi. E ta un di e sosionan involví den e kompra.

Ambos negoshante tin un eksperensia amplio den sektor di restorant na Hulanda, kaminda ku Beeren ta manehando un restorant ku dos strea di Michelin i Landman tin vários negoshi na Den Haag. Beeren i Landman konosé otro for di e tempu ku nan tur dos a studia na Hoge Hotelschool na Den Haag, kaminda nan tabata kompartí un kamber ku otro. “For di e tempu ei no a bisa ku un dia nos ke hasi algu huntu, pero den e kaso aki esei a materialisá tambe”.

Plannan

Ainda no a publiká nada tokante e plannan di e doñonan nobo. Resientemente Ocean Oasis tabata den notisia pa motibu ku e doñonan original tabata tin un plan pa bin ku un hotèl nobo banda di e restorant. Den e plannan aki pareha di gezaghèber Edison Rijna ta fungiendo como kònsùltent, loke a kondusí na krítika riba e promé mandatarion, entre otro den e artikulo krítiko Follow The Money ku a keda publiká siman pasá.