Kralendijk- E kompania di gobièrnu Oil Trading Bonaire (OTB) ya pa algun aña ta hibando pèrdida finansiero basta pisá. Esaki a sali na kla den un reunion di komishon di Konseho Insular di djaweps atardi.

Freddy Curiël, presidente komisario di a menshoná e montantenan di pèrdida den transkurso di e último añanan. Na 2018 OTB a hiba un pèrdida di 104.000 dòler, na 2019 esaki a subi na 355.000 dòler i nan 2020 un pèrdida di 293.000 dòler. Ku otro palabra, den apenas tres aña tin un pèrdida kumulativo di no ménos ku 752.000 dòler.

Curiël a splika tambe ku aunke a kuentanan anual di OTB pa añanan 2018 i 2019 no a keda aprobá ainda pa ouditor eksterno, e sifranan ta kla si. Ta e intenshon pa na dado momentu presentá e sifranan di ámbos 2018 i 2019 ‘den un solo tiru’ na gobièrnu ku ta e akshonista di OTB.

Penoso

E perdidanan ku a hasi ku operashon di OTB a pone ku e kompania ta den un situashon finansiero bata penoso, i ku apenas tin sèn pa hasi invershon den mantenshon nesesario, entre otro riba tankinan di kombustibel na airport pa tènk avion. Mester invertí un suma basta grandi, entre otro pa siguridat di kandela pa ku e tankinan aki.

A bini bastante pregunta krítiko dilanti den Konseho Insular, prinsipalmente di parti di oposishon, kiko ta lógika di keda hinka sèn den un kompania ku solamante ta pèrdiendo plaka. Segun lider di Partido Demokrat, e situashon ta unu kaminda di forma indirekto, ta pueblo di Boneiru ta pagando pa por bende kerosin na un prèis faborabel na entre otro KLM.

“Mayoria entrada di OTB ta saliendo for di pòtmòni di nos hendenan ku ta yena tanki di nan outo, i riba kual OTB ta gana algu pa kada liter. Na otro banda, OTB ta kobrando un prèis masha abou na por ehèmpel aeropuerto pa hür di e tankinan. Asina abou ku nunka OTB lo por hasi ganashi òf paga pa mantenshon” asina Abraham a trese dilanti.