KRALENDIJK – Djamars 13 di ougùstùs 2024 Walter Kuper, fiskal mayó di Ministerio Públiko di Boneiru, St. Eustatius i Saba (BES), a risibí un chèk di 300.000 dòler for di man di Ministerio di Hustisia Merikano. 

E suma ta un porsentahe di ganashi di un investigashon penal merikano di labamentu di plaka. Ministerio Públiko BES a duna aporte na e investigashon aki dor di konfiská un yate ku a ser atkirí ku ganashi di e echonan kastigabel aki. A traspasá e yate na e tim investigativo merikano i despues ku a deklará esaki konfiská, a bendé. A base di un konvenio ku ta na vigor entre Merka i Hulanda, a husga ku un porsentahe di e ganashi lo bai pa Ministerio Públiko BES. Ta promé biaha ku ta implementá e konvenio aki ku repartishon di e ganashi.

Mas sostenibel

Ku e suma risibí Ministerio Públiko lo ehekutá un plan eksistente pa hasi e edifisio i e parke di vehíkulo mas sostenibel. Di e manera aki, dor di un di bon finansiero úniko, por realisá un kontribushon permanente na medio ambiente di Boneiru.