PHILIPSBURG – E outoridat aéreo di Sint Maarten mester disidí riba e petishon di Z Air pa por tuma buelo pa St. Maarten i di St. Maarten pa región den un periodo di un luna.

Esei ta e resultado di un kaso ku e aerolínea a entamá kontra e outoridat aéreo di Sint Maarten (SMCAA), pasobra e petishon tin kasi un aña di tempu kaba den proseso, sin ku ta yega na un desishon.  Sentral den e disputa ta ku Z Air ta bula ku avionnan ku ta registrá den Merka i SMCAA ta bisa ku nan no tin klaridat ken ta supervisá operashon di e avionnan en kestion. Un punto di bista ku no ta wòrdu kompartí pa e outoridat aéreo di Kòrsou, ni pa esun di Aruba.

Durante tratamentu di e kaso, Z Air a laga sa ku tin un protokòl multilateral entre e islanan i Hulanda ku ta stipulá ku e paísnan i islanan lo laga e aerolíneanan di otro operá ku un minimo di rekerimentu.

Sin desishon final

Den su desishon, wes no a bai asina leu pa fòrsa SMCAA pa duna e pèrmits, pero a stipulá sí un limit di tempu pa tuma un desishon riba e petishon di Z Air.

Entretantu, gobièrnu di Kòrsou ta ning derechonan pa buelonan adishonal di Winair ku ta operá for di St. Maarten, tanten ku e kuestion aki no ta solushoná. “Un kuestion di resiprosidat,” asina minister di tráfiko Charles Cooper a bisa.