WILLEMSTAD – Partisipantenan di e prome seminario ‘Opsporing & rechtshandhaving e-gaming’ no tabatin idea kon e prosesonan ta kana dentro di e mundu di hunga plaka ònlain na Kòrsou i den ki magnitut. Esei e organisashon ta informá den un komunikado di prensa.
E opservashon ta bini di reakshon- i preguntanan ku a bini di sala. Den oula di Universidat di Kòrsou partisipantenan ta haña un bista di e manera di traha di ofisinanan di trust ku ta atministrá un kantidat enorme di empresanan di buzon di hunga plaka via suplisensianan.
Ta trata di miles di kasino ònlain, ku huntu ta generá un montante na entrada di miles di miones den volúmen di nogoshi mundialmente, di kual kaha di gobièrnu di Kòrsou pa trinta aña kaba no ta mira kasi nada bèk.
Tambe a ilustrá a base di sentensia- i dokumentunan di korte kon algun ofisina di trùst i empresanan di kasino ta defroudá, i ta trata di tene personanan direktamente embolbí i fluho di sèn skondí, di ken nan ta bèrdaderamente i ku tòg por probechá di e industria di hunga plaka ònlain.
Esaki ta posibel pa motibu di un falta total di supervishon i esei e oradónan invitá a sa di ilustrá dokumentá. E organisashon ta haña lástima ku representantenan di e asina yamá doñonan di lisensia prinsipal i e ofisinanan di trùst mará na nan no tabata presente durante e promé seminario.
“For di nan propio práktika nan lo por a aklará esaki i por a reakshoná”, Peter Comello di Comtado Carib ta bisa. “Den nos trabou nos ta sali for di buskeda di bèrdat i ta ansioso pa sa e vishon i eksperensianan di e trùst i industria di hunga plaka mes.”
P’esei Comtado Carib ta urgi esnan direktamente embolbí pa partisipá di nobo na e seminario. Esei por awe kaba pa 2’or di mèrdia ora e di dos seminario ta tuma lugá ku e tema ‘Masterlicenties & Sublicenties 1.0’.
Den e seminario aki ta plantea e aspektonan penal i otro aspektonan hurídiko di e fenómeno aki. Oradó invitá ta mr. Rogier van den Heuvel, Partner di e ofisina di abogado Van Eps i motor tras di e práktika corporate ligitation (entre kua e-gaming) i speshalista riba tereno di kompetensia.
E ta papia tokante di normanan legal di (in)aplikabilidat di kréditonan komo resultado di wega i kompetensia.
Nardy Cramm, publisita i blogger di Knipselkrant Curaçao i direktora di Stichting Belangenbehartiging Online Kansspelen (SBGOK) ta un eksperto di E-gaming. E ta papia a base di un par di kaso i suplisensia i lisensia prinsipal i e ròl di ofisinanan di trùst i otro atministradó di impuesto finansiero.