KRALENDIJK – E storia ta konosí. Billy Valentijn, ku a biba hopi aña na Boneiru i awor ta kedando Hulanda pa motibu di su malesa, ta soña di por bolbe Boneiru un biaha mas. Ta parse ku e soño aki, landa den e dushi i bunita laman, ta inalkansabel pa motibu di e gastunan haltu: KLM ta pidi 36.000 dòler pa un pasashi ida i buelta pa Billy. E kompania di aviashon a haña hopi krítika pa esaki. Den e propio kompania tambe. E propio personal tambe tin pregunta. Pilot Niels de Leeuw no ta laga e asuntu aki keda asina i a disidi pa bai yuda Billy via su plataforma Run4Billy.

Valentijn tin un soño ainda. Su deseo di mas grandi ta pa bai Boneiru un biaha mas ku fakansi kaminda su mama ta ward’é. Pa logra esaki mester bai koba den e pòtmòni. Pasobra mester transportá Billy riba un kama. Pa por hasi esaki mester saka stul i pone nan bèk despues.  KLM so ta brinda e oportunidat aki pa transportá Billy. Nan a fiha un preis pa esaki. Na promé instante a papia di 30.000 dòler. Pero finalmente KLM a pidi un suma total di 36.000 dòler pa hasi Billy su soño bira realidat.

Lesadónan di entre otro Bonaire.nu a kontestá positívamente riba e pregunta kasi imposibel aki. Via un akshon Gofundme a rekoudá kaba mas ku 7.500 dòler. Huntu ku e fondonan di 15.500 dòler ku tin kaba a rekoudá te ku awor 23.000 dòler. Por hasi donashon ainda via Gofundme.

Personal di KLM ta komprometé nan mes 

E akshon di Billy Valentijn no ta biba solamente serka e lesadónan di Bonaire.nu. Personal di KLM tambe a laga tende di nan. Pilot Niels de Leeuw di e kompania di aviashon a laga sa ku e ta bai partisipá 24 novèmber na e máratòn di Kòrsou. E no ta bai kana riba sapatu spesial, pero riba slòf. Su meta ta pa rekoudá fondo pa hasi e soño di Billy bira realidat.

Redakshon di Bonaire.nu a buska kontakto ku e bosero di KLM na vários okashon, pero te ku awe e kompania di aviashon no a reakshoná ainda. De Leeuw a purba di haña kontakto ku su dunad’o di trabou, pero e tampoko no a haña ningun reakshon te ainda.