WILLEMSTAD – Promé minister di Kòrsou Gilmar ’Pik’ Pisas a konsultá djaluna último hunto ku Jandino Asporaat tokante e daño konsiderabel den e parke di naturalesa Hofi Mango despues di e último yobida torensial. E daño no ta trata naturalesa so, pero tambe e infrastruktura manera e restorant i otro fasilidatnan riba e tereno. Asporaat, doño di e parke, a presentá un plan pa mehorá e maneho di awa riba e isla.

Durante e enkuentro a palabrá ku e ministerionan di Salú, Naturalesa i Medio Ambiente (GMN) i Tráfiko, Transporte i Maneho Urbano (VVRP) huntu ku ekspertonan di e organisashon di Asporaat lo evaluá e sistema di maneho di awa eksistente. Ku e meta pa desaroyá un plan konkreto i duradero pa mehorá e situashon.

Djamars mainta a sigui un bishita na e parke, kaminda representantenan di e organisashonnan menshoná a evaluá e daño i a palabrá pasonan ku lo sigui tuma. Ámbos partido, tantu Pisas komo Asporaat tabata satisfecho ku e resultadonan di e promé enkuentro krusial aki.

Via medionan sosial Asporaat a ekspresá su frustrashon riba destrukshon di su parke, ku segun e ta konsekuensia di maneho di awa inadekuá riba e isla. E yobida fuerte di djasabra 4 di mei a kondusí na inundashon- i roinan di lodo, partikularmente den e parti pabou di Kòrsou i no a spar otro partinan di e isla tampoko. Danki Dios no tabatin herido.