KRALENDIJK- Djadumingu anochi despues ku polis a kore ku tur hende djasabra anochi, spesífikamente for di kaya Kòrsou, djadumingu a sosodé mes kos. 

Hopi polis a presentá mas o ménos 8or di anochi i a pidi pa motosaikel i skuternan stashoná den kaya Kòrsou, mustra nan reibeweis i papel di seguro. 2 di nan no tabata kumpli ku e rekisitonan i polis a bai ku nan warda. Ta trata di un motosaikel di un konosido DJ lokutor i un skuter di un otro persona. Polis a pidi i a blòkia e área pa asina kontrolá tur loke nan a pidi. 

Zonido

Polis a  bisa ku nan a presentá, debí na e zonido fuerte ku tin di vehíkulonan den kaya. Hende a yama duna keho. Diferente interkambio di palabra, entre polis i algun persona na e sitio. Hopi frustrashon serka koredónan di motosaikel i skuter, entre otro ku no tin un sitio apropiá pa nan praktiká loke nan ta gusta.