ORANJESTAD – Ayera mainta polis a haña dos kurpa sin bida na Aruba. Unu tabata banda di un outo ku tabata stashoná na Bushiribana i un otro na e adrès ku tabata asosiá ku e plach’i number di e outo.

A identifiká e víktimanan komo Jorge Miguel Garcia Moreno di 35 aña, prosedente di Venezuela, i Leilia Gregoria Contreras Romero di 49 aña, nasé na Aruba.

A kuminsá ku e investigashon mainta tempran ora sentral di polis a haña un yamada di un posibel kurpa sin bida banda di un outo na Bushiribana. Na yegada na e sitio polis a haña di bèrdat un kurpa ku no tabata duna señal di bida mas.

A manda mésora tim di investigashon, polis tékniko i un dòkter forense na e sitio pa kuminsá ku e investigashon. Tambe a informá asistensia na víktima.

Di dos víktima 

Na promé instante e investigashon a stanka ora ku no por a identifiká e kurpa mésora. Pero ora ku polis a kontrolá e doño ku tin registrá di e outo, esaki a kondusí na un kas. Den e kas ei outoridatnan a topa un di dos víktima, un muhé ku tambe tabata morto den e kas.

Na e momento aki e detayenan di e kousa di morto i e posibel relashon entre e dos víktimanan no ta konosí ainda. E investigashon di polis ta andando i mas detaye lo sigui despues.

Polis ta pidi testigunan, ku posiblemente por a mira algu òf ku tin informashon di e insidente, pa tuma kontakto ku e liña di tep di polis.