KRALENDIJK – Korps Politie Caribisch Nederland (KPCN) ta atvertí mayor- i tutornan di muchanan chikí pa e kantidat kresiente di yamadanan di emergensia prosedente di muchanan ku ta hunga ku telefon selular. A ripará e oumento aki awor ku fakansi grandi a kuminsá i ku lo por kousa retraso ora mester alkansá operadónan na momento di situashonnan di emergensia real.

E sentral di polis ta risibí den e periodo di fakansi aki un kantidat kresiente di yamada di muchanan ku ta hungando ku telefon selular. Operadónan ta dediká hopi tempu na kontestá e yamadanan aki i mester evaluá despues si berdaderamente ta trata di un situashon di emergensia. Esaki por tin komo konsekuensia ku personanan ku di bèrdat ta den peliger òf mester di asistensia urgente, tin problema pa alkansá un operadó.

Karchi sim 

KPCN ta enfatisá ku asta selularnan sin karchi sim por hasi yamada pa numbernan di emergensia. Polis ta hasi un yamada riba mayor- i tutornan pues pa ta alerta ora nan laga nan yunan hunga ku telefonnan selular.