WILLEMSTAD – Den un luna di tempu polis a detené na tur 18 sospechoso pa ladronisia di outo, baiskel, skuter i motersaikel. Esei e matutino Èxtra ta informá. Djaluna último a detené G.H.D. di 21 aña, nasé na Kòrsou relashoná ku un seri  di ladronisia di vehíkulo ku a tuma lugá den aprel i mei den Sta Rosa Nort. Anteriormente a hasi kuater detenshon kaba den e kaso aki. 

E barionan kaminda e ladronnan ta terorisando ta Montaña Abou, Noord Zapateer, Kirindongo Abou, Noord Sta Rosa i Ma Louisa. 

A detené un sospechoso pa ladronisia den e área di Schottegatweg Noord. A detené dos hòmber di 19 i 24 aña pa ladronisia di skuter i outo den Cas Cora. Un mucha hòmber di 19 aña pa ladronisia di skuter i outo na Seru Grandi i un hòmber di 28 aña pa ladronisia di outo na Hubert Schoopstraat. A arestá kuater hòmber di 28, 26, 19 i 28 aña pa ladronisia di outo na Sta Rosa Nort i dos hòmber di 26 aña pa ladronisia di outo na Cas Grandi.

Pa loke ta trata ladronisia di skuter den Montaña Abou a arestá kuater hende hòmber, bou di kua un menor di edat di 12 aña. E otro personanan tabatin 34, 18 i 42 aña. A detené un hòmber di 24 aña pa ladronisia di skuter na Schottegatweg Nort, mientras a arestá un hòmber di 40 i unu di 21 aña pa ladronisia di skuter i outo na Montaña Abou i Sta Rosa Nort.

Aña pasá a hòrta 292 vehíkulo  sigurá na Kòrsou, vandalistanan a destruí 288 i a sende 21 na kandela.