WILLEMSTAD – Djamars, riba òrdu di Ministerio Públiko, polis a pone beslag riba sinku kasonan inmóvil na Kòrsou. A efektuá e ponementu di beslag den kuadro di e investigashon Themis.

A pone e beslag dentro di e investigashon finansiero penal ku tin kontra Shurandy Quant, ku Ministerio Públiko ta mira komo e big boss di No Limit Soldiers (NLS).

Na novèmber 2020 a arestá Quant na Dubai, pero no a entregué ainda. E prosedura di ekstradishon ta tuma tempu, pasobra Reino no tin tratado di ekstradishon ku Dubai.

Tin sospecho kontra dje ku el a duna òrdu pa diverso likidashon, sekuestro, duna guia na un organisashon kriminal i labamentu di plaka. Probablemente a kometé e aktonan aki den diferente paisnan di Reino i tambe pafó di Reino.

Ministerio Públiko ta sospechá ku Quandt a invertí  plaka kriminal den e sinku kasonan inmóvil ku a menshoná anterior. Banda di e ponementu di beslag a tende tambe riba 30 di ougùstùs relashoná ku esaki diferente testigu.

Bou di guia di Ministerio Públiko di Kòrsou i Ministerio Públiko di Sint Maarten un tim di rishèrshi konsistiendo di miembronan di kuerpo polisial di Sint Maarten, Kòrsou i Aruba i Recherche Samenwerkingsteam RST ta hasiendo e investigashon Themis.