KRALENDIJK – Ayera nochi Arjen van Rijn a tene un charla den Pasangrahan na Boneiru. Den su charla e profesor ta boga pa Boneiru lucha pa e derecho di outodeterminashon. Ku e derecho aki e isla mes por i mag hasi su eskohonan.

Públiko a sigui e charla di profesor Arjen van Rijn ku hopi interes den e kas munisipal di Boneiru. Tribuna públiko tabata kompletamente yen. Den sala di konseho insular tabatin un panel konsistiendo di tres persona i profesor Arjen van Rijn. El a duna un charla tokante historia di islanan BES. Tambe van Rijn, ku alabes ta konsehero di konseho insular, a bisa ku Boneiru mester reflekshoná bon tokante e derecho di outodeterminashon. Den un di su afirmashonnan e profesor a bisa: “No laga nan kohebo di sorpresa ku reglanan sentral di Hulanda. Reflekshoná riba e derecho di outodeterminashon”.

Derecho di outdeterminashon

E derecho kolektivo di outodeterminashon ta e outonomia ku pueblo- i estadonan tin. E tratado di Nashonnan Uní a deklará na 1966 ku pueblonan tin derecho riba outodeterminashon. E ta un parti di derechonan humano.

Miembro di e panel Ramiro Richards a bisa den un reakshon despues di e charla di Arjen van Rijn: “Ta hopi tristu kon kos ta bai awor aki. Den Haag ta disidí pa Boneiru kua regla nos mester sigui. Reglanan tokante por ehèmpel kuido di hubentut na Hulanda nos mester kopia di nan. Na e momento aki tin muchu tiki aporte di e islanan. Hulanda ta disidí”.

Pa añanan largu kaba Boneiru ta konfrontá problemanan ku por ehèmpel salubridat, enseñansa, pues kuido pa hubentut. Hulanda ta disidí pa Boneiru kua regla mester sigui. Esaki no ta kuadra tur ora ku e struktura lokal i e kultura di e isla.