KRALENDIJK- Djadumingu anochi algu despues di 7 ‘or e promé avion di Corendon a baha na aeropuerto Flamingo. 

Ta promé biaha ku e organisashon di biahe a bini ku su propio buelo pa Boneiru. Corendon ya tin un aña ta bulanda pa Kòrsou pero awor tambe a disidí di hinka Boneiru den su ret di destinashon. E buelonan lo baha na Boneiru dos biaha pa siman, den kombinashon ku e buelonan pa Kòrsou.

E buelonan di Corenden ta wòrdu ehekutá ku un Airbus A350 ku ta un avion relativamente moderno, di e kompania Spañó World2fly. 

Na salida di e promé buelo for di Schiphol awe merdia, a duna tur pasahero un atenshon pa konmemorá e buelo aki. Ku e buelo nobo di Corendon Boneiru ta hopi bon sirbí ku buelo di no ménos ku 3 kompania, esta KLM, Tui i awor tambe Corendon. 

Aktividat

Na okashon di e promé buelo mañan atardi lo tin un konferensia di prensa ku doño di Corendon, Atilay Uslu, i parti anochi lo tin un fiesta pa tur hende ku a koperá ku lansamentu di e promé buelo.