DEN HAAG – Ministerio di Infrastruktura i Gestion di Awa  (IenW) ke kambia e Lei di Aviashon BES. E kambio aki ta hasi posibel pa instituí reglanan spesial pa rutanan aereo den Hulanda Karibense i entre e islanan i otro partinan di Reino. Tur hende por reakshoná te ku 26 di yüli riba e proyekto aki.

Ku e lei nobo e minister di IenW por traha reglanan pa kompanianan di aviashon ku ta bula riba sierto ruta. Por ehèmpel preis di pasashi máksimo,  un kantidat mínimo di buelo pa siman i un sierto kantidat di asiento pa buelo. E minister por disidí tambe pa skohe un di e kompanianan di aviashon pa e rutanan aki via un destaho.

E meta di e kambio aki ta pa mehorá e aksesibilidat di e islanan den Hulanda Karibense. Spesialmente pa Sint-Eustatius i Saba un bon konekshon aereo ku Sint Maarten ta hopi importante. Mihó aksesibilidat ta yuda ku desaroyo ekonómiko  sosial i ta pèrkurá ku por ehèmpel skol- i hòspitalnan ta mihó aksesibel.

Awor aki e lei ta den su promé fase, e fase di konsulta. Na momento numa ku a aprobá e lei, por instituí e reglanan nobo. Despues mester buska finansas tambe. E gabinete nobo lo disidí riba esaki.

Te ku 26 di yuli 2024 tur hende por duna nan opinion riba e proyekto aki via e website Overheid.nl.