DEN HAAG – Ministerio Públiko na Hulanda ta duna un rekompensa di 10.000 euro pa e tep ku ta kondusí na haña  e persona Sherwin Windster. El a hui e verano aki huntu ku un otro prisonero for di Pompekliniek na Nijmegen.

A kondená Windster di 27 aña na 5.5 aña di kastigu di prisòn i poné na disposishon di estado  pa ekstorshon dòbel i un atrako armá, kaminda un morto  a kai. E tabata kaba riba Lista Nashonal di Lokalisashon.

Tambe e ta riba lista di e sospechosonan mas buská riba e lista di Europol, Europe’s Most Wanted List. Riba e lista ei tin desénas di sospechoso Europeo. Tin di nan, entre kua Windster, ta denominá komo “peligroso”.

Polis ta pensa ku e tabata òf ainda ta na Belgika. Ta konsehá personanan ku mira Windster òf sa unda e ta, pa no aserk’é nan mes.

Pèrdí 

Na luna di yüni Windster a hui for di Pompekliniek huntu ku un otro persona ku tambe ta na disposishon di estado, Luciano Dijkman. Despues di mas ku un siman a detené Dijkman na Den Haag. Despues di kasi mitar aña no a logra lokalisá Windster ainda.

Siman pasá un primu di Windster, Kendrick M, a hui for di e klínika na Nijmegen ku ayudo di un outo ku tabata pará kla. Despues di su huida Kendrick M. a hinka un señora na Soest mata. E mésun dia a detené na Bergschenhoek.