WILLEMSTAD – Ounke Jetair Caribbean resientemente a duna informashon tokante nan plan pa ofresé buelonan regular pa Aruba i Bonaire entrante dia 1 di novèmber usando un avion ATR di 50 pasahero, awor ta resultá ku tin un retraso den e ehekushon di e plan.

Segun e kompania di aviashon, e hürdó di e avion a raportá un retraso den e proseso di entregue, ku tin di haber ku registrashon di e avion en kestion. P’esei, ta indikando kue buelonan for di 1 di novèmber 2023 no ta posibel mas.

Segun Jetair, pasaheronan ku ya a hasi nan reservashon pa e biahenan en kuestion, a wòrdu informá tokante e retraso. Tambe e kompania di aviashon ta bisa di hasi tur su posibel pa ofresé solushonnan alternativo na e pasaheronan ku ta afektá pa e restraso.

Solushon rápido

“Ekipo di Jetair Caribbean ta aktivamente envolví den e proseso pa pone e avion den servisio. Nos ta komprondé importansia di ofresé un servisio konfiabel na nos pasaheronan, i nos ta dediká pa yega na un solushon rápido pa e problemanan aki,” asina e kompania di aviashon a bisa.