ORANJESTAD – Hóbennan na Aruba tin problema ku sobrepeso, obesitas, kuminda ku no ta salú, insufisiente movishon i uso di alkohòl. Esei ta un di e resultadonan di e enkuesta i e investigashon di Kuido di Salú hubenil pa loke ta trata salú i bienestar di mucha- i hóbennan riba e isla.

Riba tereno di salú emoshonal i mental nan a opservá problemanan sikológiko, spesialmente ora ta trata komportashon emoshonal i komunikashon, relashon mayor i yu i aspektonan sosial na kas. Hopi mucha tin miedu di e reakshon di nan bisindario riba nan komportashon.

Segun un gran kantidat di mucha ku a partisipá na e sondeo, nan miedu di mas grandi ta di haña straf òf ku nan lo a faya na skol.  Segun sondeonan di 2019 i 2021 algu mas ku 30% di mayor ta duna di konosé ku nan tin difikultat ku edukashon di nan yu.

Kambionan i e situashon aktual riba nivel nashonal i internashonal tabatin impakto e último añanan riba salú i bienestar di hóbennan na Aruba.

Diferente aspekto di salú i bienestar di hóbennan Arubano ta rekerí mas atenshon segun Kuido di Salú hubenil.

Algun ehèmpel ta sobrepeso, falta di nutrishon i di movishon ku por okashoná malesanan króniko, malesanan ku no ta kontagioso.

Esaki ta eksihí refuerso di prevenshon i sosten na mayornan i tutornan di muchanan, pero tambe koperashon di sektornan di kuido pa evitá ku kuido ta bira muchu karu pa motibu di e malesanan aki.

Pa loke ta trata Kuido di Salú hubenil ta resultá ku muchanan no ta haña e ayudo i kuido nesesario na tempu. Tin algun faktor ku por kousa e problemanan aki. Manera por ehèmpel no ta konosí serka mayornan tur servisio i kuido ku por hasi uso di dje. Listanan di espera por ta hopi largu i kompania di seguro AZV òf otro seguro no ta kubri tur gastu di kuido.