WILLEMSTAD – Djasabra un hòmber a hoga na e playa di Marie Pampoen. Na yegada di polis habitantenan di e bario a sak’é for di awa.

Ta trata di un pasahero di e barku krusero Rotterdam, ku a mara djasabra den haf di Kòrsou. Personal di ambulans a purba di reanimá e víktima na e sitio, pero esaki no a duna resultado.

For di un promé investigashon a resultá ku e tabata sambuyá den laman brutu ku konsekuensia ku el a guli hopi awa i a presentá komplikashon.

Polis a bai ku e ekipo di buseo pa investigashon mas aleu i tambe a tuma e kurpa den beslag pa hasi outopsia. Lo anunsiá e identidat di e víktima despues di a informá su famia.