KRALENDIJK- Kuerpo Polisial Hulanda Karibense(KPCN) ta mira bèk ku satisfakshon riba Dia di Rincon, 30 di aprel.

E dia a kuminsá ku un santu sakrifisio di misa i ku hisamentu di bandera di Rincon bou di ouspisio di agentenan di KPCN, prosedente di Rincon. Durante dia tur kos a kana sin niun problema.

Den oranan di anochi durante e último simadan a hasi detenshon di dos hóben riba Kaya C.D. Crestian despues di un bringamentu. A detené un mucha hòmber di inisial S.M.L. di 17 aña di edat en konekshon ku violensia públiko, maltrato i pa resistí kontra un ámtenar den funshon i un mucha hòmber di inisial G.R.O. di 17 aña di edat en konekshon ku violensia públiko, resistensia ku violensia kontra un ámtenar den funshon, pa no duna oido na òrdu di polis i pa opstrukshon di un akto ofisial.

Tiru di atvertensia

Durante e bringamentu aki algun polis den nan ora liber (in burger) a bai atendé ku esnan enbolbí miéntras a pidi refuerso di demas koleganan. Na nan yegada mester a hasi uzo di un arma reglamentario pa a lòs tiru di atvertensia. Ta investigando e kaso.
 
“Por konkluí pues ku Dia di Rincon tabata unu trankil kaminda pueblo di Boneiru i bishitantenan a laga mira atrobe ku huntu nos por sòru pa un dia seif i dushi. Huntu nos ta karga e responsabilidat pa un isla seif”, asina KPCN a bisa den un komunikado djamars atardi.