KRALENDIJK- Segun konsehal Yona Chirino-Felida (UPB), no por papia di un ‘flòp’ ora ta papia di un kumbre resien na St. Maarten, kaminda ku Boneiru, St. Eustatatius i Saba a topa pa deliberá riba kambionan proponé di parti di Hulanda den leinan di WolBES i FinBES. 

Esaki Chirino, akompañá pa su kolega Roderick Groenman, a bisa den e programa radial ‘Op de Klippen’ djasabra mèrdia. 

E konsehalnan di partido bèrdè a wòrdu invitá pa ‘Op de Klippen’, despues ku e sitio di notisia hulandes Dossier Koninkrijkrelaties a skibi di forma hopi negativo riba e kumbre. 

“Mi ta haña inaspetabel ku e esfuersonan di e tres islanan aki ta wòrdu bagetalisá di e forma aki pa terser partido. Tampoko mi no ta di akuerdo ku por papia di un frakaso. Nos a yega na un akuerdo riba 17 di en total 21 punto riba kual nos a deliberá”, asina Chirino a bisa. 

Chirino a mustra su mes basta krítiko pa loke ta trata e periodista René Zwart, di Dossier Koninkrijksrelaties. “Kiko ta e agènda di René Zwart ? Pa kiko e ta hasi loke e ta hasi? Kiko e ke logra?”, ta algun di e preguntanan ku Chirino a hasi den e programa. Chirino a sugerí tambe ku Zwart ta hañando su informashonnan di sierto presentenan na e konferensia, ku tin sierto mira polítiko. “Zwart no tabata tei na e konferensia, pero tòg e tin masha hopi informashon ku sierto hende ta manda p’e”, asina Chirino a bisa. E konsehal di UPB a sugerí tambe ku tin sospecho ta ken e persona aki ta, pero ku lo no trese e sospechonan dilanti pa awor. “Pero e dia lo yega ku tur kos ta sali na kla”, asina Chirino a konkluí. 

Balioso

Konsehal Groenman a splika ku e kòmbersashonnan entre e tres islanan ta hopi balioso i importante. “Pa años nos a purba yega nan deliberashon entre e tres islnan. Ounke ta trata di tres isla totalmente diferente, kada un ku su propio retonan, tin hopi kos ku nos mester papia riba dje i ku ta afektá nos tur. Manera, kiko ta bai pasa ku e fushon di representante di reino si abolí e funshon aki? Kiko ta bin na su lugá? Nos ta haña deseabel pa un hende sintá por ehèmpel na Den Haag ta bai tuma ofer e tareanan di e representante di Reino, ku al menos ta akinan i sa kiko ta pasa akinan”, asina Groenman a trese dilanti.