WILLEMSTAD – E sekretario di estado nobo pa Relashonnan di Reino, Zsolt Szabó, a tene ayera su promé bishita ofisial di trabou na Kòrsou. Despues di su bishita na Aruba anteriormente e siman aki, a toka turno awor na Kòrsou. E sekretario di Estado a kuminsá su bishita di trabou ku un bishita di kortesia serka gobernador Lucille George-Wout.

Seguidamente Szabó tabatin un enkuentro ku promé minister Gilmar Pisas. Durante e kòmbersashon aki e dos mandatarionan a interkambiá di idea riba diferente tópiko ku ta na interes di relashonnan di Reino. A trata entre otro e ehekushon di e Landspakket, tambe kontinuashon di doziénan importante manera e situashon rondó di Ennia i Curaçao Medical Center (CMC). E asuntunan aki tin un impakto grandi riba e presupuesto di gobièrnu di Kòrsou.

Sekretario di estado Szabó a enfatisá tambe ku e gobièrnu Hulandes nobo lo bai enfoká den e periodo benidero riba temanan manera bon gobernashon, maneho finansiero sólido i outonomia di e islanan. Promé minister Pisas lo kontinuá e kòmbersashonnan ku e sekretario di estado riba e tópikonan aki.