KRALENDIJK – E aña aki atrobe Selibon N.V. ta yuda pa tene Regata na Boneiru limpi. Pero e biaha aki e kompania di rekohé sushi ta trata otro, ku medidanan nobo pa siña e hendenan separá sushi mihó.

Durante e siman di Regata Selibon ta pone alrededor di 160 kliko di 240 liter i 15 baki grandi di 1000 liter partí riba e tereno kaminda e eventonan ta tumando lugá. Tambe ta bini un kònteiner pa sushi grandi di 12 m³ pa e residuo di stèntnan.

Un idea nobo e aña aki ta e “stashonnan mini di medio ambiente” na sinku te shete sitio. Na kuater di e stashonnan aki por separá  sushi den kònteinernan spesial: unu pa glas, unu (blou) pa karton i unu (oraño) pa plèstik. Ku esaki Selibon ke yuda hendenan pa trata konsientemente ku separashon di sushi i resiklahe.

Tras di e stènt- i trùknan di kuminda tambe Selibon ta tuma medidanan èkstra. Akinan ta bini kònteinernan spesial di metal kaminda na final di nochi por benta karbon, di manera ku por transportá esaki na e manera adekuá.

Selibon ta pone un tim di 15 pa 20 trahadó disponibel pa limpia henter e tereno  tur dia durante e evento.

Ku e akshonnan aki Selibon ke pèrkurá pa un Regata limpi i plasentero. “Nos ta spera ku e medidanan nobo aki no yuda durante Regata so, pero ku nan ta hasi e hende mas konsiente tambe di e importansia di separashon di sushi na Boneiru,” segun un bosero di Selibon.